Над 300 странски државјани од септември 2012 до мај 2013 ја посетуваат едногодишната подготвителна настава по македонски јазик на Филолошкиот факултет и ако го положат испитот и добијат сертификат ќе може да се пријават за студии на кој било факултет на Универзитетот „Св. Кирил и Методиј“ во наредната академска година.

Часовите кои ќе им овозможат да го совладаат македонскиот јазик за да може да студираат во иднина, ги организира Меѓународниот семинар за македонски јазик, литература и култура, во соработка со Филолошкиот факултет „Блаже Конески“, од чиј наставнички кадар се предавачите на програмата.

Доминантен е бројот на студенти од Турција, има и од Бугарија и Србија, но и од Холандија, Литванија, Шпанија, Хрватска, Словенија, кои дошле преку образовната програма „Еразмус“.

Слушателите на подготвителната настава беа поздравени од министерот за образование и наука Панче Кралев и ректорот на УКИМ Велимир Стојковски. Кралев рече дека успешноста на еден универзитет се мери со неговата меѓународна отвореност и истакна дека програмата ќе биде и мост за соработка меѓу Македонија и земјите од каде што доаѓаат студентите, а дека тие оттука ќе понесат убави впечатоци.

МОН планира и да ја прошири програмата за стипендирање странски студенти и таа да важи за сите кои ќе ја завршат подготвителната наса=тава по македонски јазик, со цел потоа да се запишат на студии во Македонија.

Ректорот Стојковски посочи дека бројот од над 300 запишани на подготвителната настава е потврда дека УКИМ по својот квалитет е рамноправен член на европското семејство на универзитети.

- Досега студентите го изучуваа македонскиот јазик во поинаква форма - курс од еден и пол месец, а првпат сега организирано и повторно преку Семинарот за македонски јазик, курсот трае една година. По завршувањето студентите ќе добијат сертификат за познавање на македонскиот јазик што ќе биде признат во светот. Тоа е добро за нив зашто истовремено подобро ќе ја запознаат и Република Македонија и нејзината култура и традиција. Тоа е добро и за сите нас, за промоција на Македонија  надвор од нашите граници, рече ректорот на Скопскиот универзитет.

На факултетите на УКИМ студираат околу 700 студенти од странство. Квотата за  запишување странски државјани на УКИМ е неограничена, но и за нив важи рангирањето што бара исполнување на конкурсни критериуми.

Стојковски информираше и дека се работи на подобрување на состојбата  на изучување на македонскиот јазик надвор од Македонија и оти се постојани заложбите за зголемување на бројот на, засега, 11-те лекторати. По неколку години преговори, рече Стојковски, УКИМ успеал да го воведе изучувањето на македонскиот јазик во наставните програми на универзитетот во Грац. Наставата во овој значаен европски  образовен центар ќе почне идниот  месец.