Почитуван претседателе на Исламската заедница во Република Македонија, господин Реис Ул Улема, Хаџи Сулејман Ефенди Реџепи,

Дозволете ми Вам лично, на членовите на Ријасетот, и на сите верници од исламската вероисповед во Република Македонија, од мое лично име и од името на Владата на Република Македонија да Ви го честитам големиот муслимански празник Курбан Бајрам.

Важноста и светлината на ваквите големи празници имаат големо значење пред се за верникот како единка, а и за односите во семејството, помеѓу роднините и пријателите, помеѓу верниците. На ваквите големи празници, секој верник е исправен пред својата совест и своите постапки, покорен пред својата верба и потчинет пред својот Бог и е раководен од потребата од општоприфатено и добро однесување. Празникот Курбан Бајрам од секогаш бил симбол за почитта, толеранцијата и љубовта помеѓу луѓето, хуманоста кон беспомошните, помалку имотните и немоќните. Вашиот авторитет и заложби, како и Вашите повици до верниците од исламска вероисповед за верување во вредностите и за нивна промоција во интерес на општото добро, имаат огромно значење за натамошното почитување и унапредување на целокупното општество.

Честитањето и уважувањето на ваквите празници го градат битието на меѓучовечкото разбирање и хармонијата во нашата татковина Република Македонија. Токму затоа, со искрени чувства на уважување кон големиот муслимански празник би сакал на сите припадници на исламската верска заедница и на нивните семејства да им посакам многу здравје, љубов, бериќет и духовен мир. Сите заедно, обединети во вредностите и во цивилизациските придобивки, да продолжиме со активностите за подобрување на стандардот на граѓаните и за економски развој, за понатамошно создавање на можности за образовен и културен напредок, за спроведување на реформите кои ќе ја унапредат состојбата на сите општествени полиња, за продолжување на модернизацијата, за остварување на европските и евро-атланстки интеграции, и изградбата на модерна и силна Република Македонија.  

Нека Ви е честит големиот муслимански празник.

Со почит,

Никола Груевски