Министерот за надворешни работи на Република Македонија Никола Попоски денеска го прими амбасадорот на Република Косово во Скопје Илбер Хиса.

МНР соопшти дека на средбата е изразено задоволство од позитивниот тренд во развојот на билатералните односи, како и од заложбите на двете страни за продлабочување на економската соработка и реализација на инфраструктурните, енергетските и инвестициските проекти.

Беа разменети мислења за евроинтегративните процеси на двете земји, при што Попоски подвлече дека Република Македонија е подготвена да ги пренесе своите искуства во повеќе области, а особено во локалната самоуправа, процесот на децентрализација и др.

Министерот Попоски изрази поддршка за продолжувањето на политичкиот дијалог на Белград – Приштина и нагласи дека изнаоѓањето трајни решенија за одредени состојби кои ги оптоваруваат односите меѓу соседите е можно единствено само преку континуиран разговор и градење мерки на меѓусебна доверба, се вели во соопштението од МНР.