Министерот за образование и наука Панче Кралев учествува на 22. Конференција на Советот за човекови права во Женева, на која го презентираше позитивното искуство од имплементација на модулите за инклузивно образование и Меѓународната класификација за функционалности - деца и млади во основните училишта во земјата.

Кралев во своето обраќање истакнал дека предизвик во иднина ќе биде начинот на кој треба да се гледа на децата со посебни потреби, потенцирајќи ги нивните способности и фокусирајќи се на тоа како да се надминат бариерите и предрасудите.

- Квалитетот на образованието преставува една од најважните компоненти во креирањето квалитетна инклузивна образовна средина и поради тоа во моментот се подготвува Национална програма за обучување на наставниците која е во целост усогласена со светско признатиот „Социјален модел“ за работа со деца со посебни образовни потреби. Програмата вклучува алатки и техники кои им помагаат на наставниците да идентификуваат, проценат и развијат индивидуални наставни програми, истакнал Кралев.

МОН соопшти дека учеството на министерот е поддржано од Регионалната канцеларија на УНИЦЕФ за Централна и Источна Европа и земјите од заедницата на независни држави, со седиште во Женева.  

На конференцијата се презентираат и искуствата од регионот. Обраќања имаат и министерот за образование, наука и технолошки развој на Србија Жарко Обрадовиќ и заменик-министерот за образование и спорт на Црна Гора Весна Вучуровиќ, како и заменик извршниот директор на УНИЦЕФ Јока Бранд.