Претседателот на Владата на Република Македонија, г-дин Никола Груевски, вчера (понеделник, 29.04.2013 година) во Мексико Сити оствари средба со претседателот на Сенатот на Соединетите Мексикански Држави, г-дин Ернесто Корадо.

На средбата беа констатирани добрите односи кои владеат помеѓу двете земји и беше изразена подготвеност за нивно понатамошно продлабочување и унапредување.
    
Соговорниците ја истакнаа својата посветеност за унапредување на меѓусебните односи на полето на економијата, пред се во областа на соработка во инвестициите.
    
Беше оценето дека двете земји можат да постигнат многу поголема економска соработка и трговска размена за што во наредниот период ќе следува интензивирање на комуникациите помеѓу државните институции. На институционално ниво ќе бидат разработени специфични области во кои може да се оствари конкретна соработка.
    
Соговорниците разменија мислења за економските состојби во двете земји, како и за движењата на светската економија.
    
Премиерот Груевски ги презентираше реформите кои се спроведуваат во нашата земја, и ги акцентираше реформите кои се спроведуваат за подобрување на деловната клима и амбиентот за водење бизнис за чии што ефекти говорат и подобрувањата на позициите на Република Македонија на меѓународните светски листи и индекси за оценка на истите.

Претседателот на Сенатот Корадо позитивно ги оцени нашите реформи и истакна признание за напредокот на Република Македонија на меѓународните светски листи и индекси за економија. Тој ги посочи македонскиот даночен пакет и ниските трошоци за водење бизнис како верификувани компаративни предности на нашата земја за привлекување на странски инвестиции.

Двајцата соговорници го поздравија почетокот на процесот за поставување на правна рамка за овозможување на соработка на ниво на мали и средни претпријатија од двете земји кој треба да се заокружи со потпишување на правен акт.

Соговорниците истакнаа дека во идниот период двете страни ќе работата на подготовка на дополнителни правни акти за регулирање и унапредување на односите на полето на економијата, заштитата на инвеститорите и олеснување на економските критериуми за овозможување на динамична соработка.