Сите лица кои добија вработување преку владиниот проект за вработување лица од социјална категорија во текот на неделава ги потпишуваат решенијата за засновање работен однос, а на работа ќе почнат да одат од 2 декември.

Портпаролот на Владата Александар Ѓорѓиев одговарајќи на новинарско прашање на денешната прес-конференција рече дека процесот се одвива транспарентно и дека  тие заедно со договорот за вработување потпишуваат и спогодба за прераспределување во институциите каде тие ќе бидат преземени од „Македонски шуми“.

Како што појасни, во „Македонски шуми“ ќе останат да работат 60 до 70 лица, а другите ќе бидат распределени во другите институциите според програмата направена од страна на Министерството за информатичко општество и администрација, а врз основа на потребите на институциите.

На 2 декември овие лица ќе се појават на работа онаму каде се прераспределени, некои во Архивот, некои во Музејот, некои во Министерството за образование и наука, во Управата за јавни приходи и слично.

По стапувањето на работа ќе има процес на обука.

Ѓорѓиев информираше дека конечната ранг листа е 1.600 лица при што 113 лица се изземени по повеќе основи, а на 113 лица им се прифатени поднесените жалби. 

- Комисијата која одлучуваше по жалбите фунционира во „Македонски шуми“ и прифати 113 жалби од страна на лица за кои се увидело дека согласно документите и податоците кои се добиени од страна на државните органи ги исполнуваат овие критериуми и тие  се внесени во рамките на овие 1.600 лица. Во меѓувреме имаме отпус на 113 лица од таа листа, кој е направен по повеќе други основи. На пример 80 лица од тие што претходно ги исполниле условите и биле најдобро рангирани во меѓувреме додека траеше процесот се вработиле дали во приватниот или јавниот сектор и на тој начин го изгубиле правото да бидат вработени како резултат на овој проект. Има околу 25 лица кои во меѓувреме, додека траел процесот, ги исполниле условите за старосна пензија. И има околу 5-6 случаи кои по други основи, некои сами, побарале да се исклучат од ранг листата. Се заокружува бројката од 113 лица кои се внесени во оваа листа и 113 лица кои се изземени, рече владиниот портпарол.