Премиерот Никола Груевски попладнево ја посети болницата Сент Луис во Париз каде имаше средба со директорот Емануел Рајсон.

На средбата, договорена е соработка за обука на медицински персонал од Македонија во оваа француска болница.

- Многу сме задоволни што можевме да го пречекаме премиерот на Македонија овде во болницата Сент Луис во Париз и подготвени сме да воспоставиме соработка особено во делот на трансплантацијата, изјави директорот Рајсон по средбата.

Тој истакна дека се решени да пречекаат екипи од Македонија, но и да испратат нивни доктори во нашата држава со цел, како што рече, да се воспостави поголема соработка помеѓу специјалисти од Македонија и од болница Сент Луис

Премиерот Груевски оцени дека оваа француска болница е отидена многу напред во повеќе области, пред се во делот за третирање изгореници, во делот на дерматологијата, на трансплантацијата, како и уште неколку други специјалности, поради што е една од најнапредните во Франција, од која, како што рече, има што да се научи.

- Од тој аспект воспоставувањето соработка со оваа болница ќе биде од корист за сите оние лекари и друг медицински персонал кој во иднина ќе дојде овде на работна обука. Исто така тие се подготвени повремено да испраќаат нивни специјалисти од различни области да дојдат во Македонија и заедно со нашите лекари и друг медицински персонал да работат на методи кои не се применуваат кај нас, истакна премиерот Груевски.