Владата нема да попушти на притисоците на некои фармацевтски компании кои реагираа на одлуката за поевтинување на над 1.200 лекови, предлог што веќе е доставен до Собранието на Република Македонија.
- Јасно е дека ќе опстоиме на тоа. Со поевтинувањето на над 1.200 лекови ќе имаат корист над 200.000 хронично болни пациенти годишно и околу 40.000 акутно болни. Се надеваме дека фармацевтските компании ќе имаат слух за промените што се актуелни и во Европа и светот и ќе разберат дека се работи за меѓународни стандарди и општата корист на македонските граѓани, изјави премиерот Никола Груевски.

Тој додаде дека, и покрај таа новина, фармацевтите ќе си имаат профит, но не, како што рече, на грбот на пациентите.

- За некои лекови цените ќе бидат подрастично намалени до 40 и 50 проценти па и повеќе, додаде претседателот на Владата одговарајќи на новинарски прашања по посетата на реконструираниот дел од гостиварската болница.