Децата без родители и родителска грижа и лицата кои до 18 години имале ваков статус од денеска ќе можат да добијат бесплатни обуки за англиски јазик кои ги обезбедува државата.

За таа цел Министерството за труд и социјална политика обезбеди вкупно 400 обуки за англиски јазик и 400 обуки за компјутери односно за Microsoft office, Word, Excel и Microsoft Windows оперативен систем.

- Денеска започнува новиот проект на МТСП за бесплатни обуки по компјутери и англиски јазик за деца без родители и родителска грижа и лица кои до 18 години имале ваков статус. Обуките ќе траат два месеца, вкупно 32 часа по 45 минути. Тие ќе може да се реализираат во сите градови во Република Македонија. Посебен приоритет ќе имаат децата кои се згрижени во згрижувачки семејства, децата кои се згрижени во установите за ваква намена, како и младите кои имале ваков статус, а се до 29 години и се уште не се вработени, изјави денеска министерот за труд и социјална политика Диме Спасов при посетата на Домот за деца без родители „11 Октомври“во Скопје.

На овој начин, додаде Спасов, сакаме да ги подобриме вештините и познавањата на овие деца и лица за англиски јазик и за компјутери, коишто се неопходни, но и, како што истакна, основна работа која треба да ја познаваат со цел во иднина да можат полесно и да се вработат.

Појасни дека на јавна набавка е избрана приватна компанија која е задолжена да ги организира обуките кои се сертифицирани. По завршувањето, истакна министерот Спасов, децата и лицата кои ќе ги посетуваат ќе добијат соодветен сертификат.

- Како надлежно министерство продолжуваме со реализација и на останатите проекти кои ги започнавме, а се во насока на зголемена поддршка на децата без родители и родителска грижа и на лицата кои до 18 години имале ваков статус односно продолжуваме со исплата на парична помош од 12.000 до 24.000 месечно за студирање, магистерски студии, па и докторски студии. Продолжуваме со исплата  на зголемената еднократна парична помош од 180 илјади денари кои ја добиваат по напуштање на домот, рече министерот за труд и социјална политика.

Потенцира дека заедно со Министерството за транспорт и врски продолжува реализација на проектот за обезбедување станови за овие категории граѓани.