Премиерот Зоран Заев, на католиците во Република Македонија, им го честиташе воздигнувањето на македонскиот Апостолски егзархат во Македонија, во Епархија, од страна на Папата Франциск.
 
Претседателот на Владата на Република Македонија Зоран Заев, испрати писмо со честитки и до Бискупот Скопски Д-р Киро Стојанов, кој со оваа одлука на Ватикан се стекна и со титулата Епарх на Епархијата Успение на Пресвета Богородица во Струмица - Скопје.
 
Во писмата со честитки до Д-р Киро Стојанов и до о. Марјан Ристов, канцелар на Бискупијата Скопска, се истакнува:
 
„Одлуката на Светиот Отец Папата Франциск, досегашниот Апостолски Егзархат во Македонија да го воздигне во Епархија под наслов Успение на Пресвета Богородица во Струмица - Скопје, за католиците од византиски обред, за нас претставува потврда за достојното внимание на Светата столица во Ватикан за верниците од католичката вероисповед во Република Македонија.
 
Во исто време со особено задоволство Ви го честитам именувањето за прв Епарх на ново востановената епархија и да Ви посакам успешна работа.
 
Слободата на вероисповедта и на верската определба, но и унапредување на правата и слободите на сите наши граѓани, останува цврста  заложба во реформирањето на нашето заедничко општество во насока на подобра и европска иднина за сите граѓани на нашата Република Македонија.
 
Примете ги уште еднаш моите честитки и желби за успешна работа и плодна мисија на ново основаната Епархија, и за новата титула Епарх на Епархијата Успение на Пресвета Богородица во Струмица - Скопје“, напиша премиерот Заев во писмото со честитки.