По повод 9-ти Мај, Денот на победата над фашизмот во Втората светска војна, претседателот на Владата на Република Северна Македонија Зоран Заев, заедно со амбасадорката на САД во земјава Кејт Мери Брнз и претставници на Сојузот на борци се поклони пред споменикот подигнат во чест на петмина американски пилоти, во село Вратница, тетовско.

Двајца од нив ги загубија животите кога на 26 август 1944 година, нивниот авион беше соборен од окупаторските сили на територијата на тогашна Македонија. Останатите тројца членови на екипажот на американскиот бомбардер „Либератор Б-24 Г“, со кодно име „Наша Љубов“ кој бил погоден и паднал на падините на Шар Планина над селото Вратница, биле спасени и евакуирани на безбедно.

Како што истакна премиерот Заев, акцијата за нивно спасување од страната на населението од Вратница е еден редок и скапоцен настан кој на уште еден силен начин ја потврдува јасната и непоколеблива определба на македонскиот народ и на припадниците на сите други етнички заедници за време на Втората светска војна.

„Застанати на страната на Сојузот на прогресивните антифашистички сили, не само што ставија крај на крвавата светска војна на бојните полиња, туку му ставија крај и на погромот на фашизмот заради кој беа погубени милиони недолжни цивили и луѓе во логорите на смртта. Сеќавањето и чествувањето на настанот од 1944 година во Вратница и поменот на петмина пилоти веќе е прифатен како еден од најсимболичните моменти од нашата заедничка соработка со САД“, рече Заев.

Осврнувајќи се на успешната соработка со САД, тој потсети на формалното сојузништво како членки во НАТО, и како уште едно признание за вредноста на Договорот за стратешко партнерство од 2008 година.

„Голема чест, а истовремено и гордост, како продолжувач на традициите, и како претседател на Владата на Република Северна Македонија, да се поклонам на борците кои се боревте и сé уште се борите против фашизмот. Се поклонувам на Вашето дело. И чест ми е да го продолжувам Вашето дело, кое за мене е аманет борбата против фашизмот никогаш да не запре“, истакна Заев.

Амбасадорката на САД, ја истакна важноста на денешниот настан и локацијата каде е подигната спомен плочата.

„Ова е место каде што луѓето од обете наши земји можат да се соберат за да слават храброст пред опасностите и конфликтите. Токму на една планина во близина на 26 август 1944 година се урна американски бомбардер Б-24Д откако го погоди непријателски оган додека се враќаше во Италија од Романија. Селаните, изложени на голем личен ризик за себе и за своите семејства, им помогнале на тројцата преживеани по планината и извадиле тела на уште двајца и ги закопале. Тоа беше длабок чин на хуманост за кој мојата земја останува благодарна“, потсети Брнз.

Амбасадорката Брнз, се осврна и на предизвикот со кој целиот свет се соочува во изминатата година.

„Заедно ќе ги обновиме нашите економии, ќе ги заживееме нашите партнерства и ќе научиме од трагедијата, исто како што ги искористивме ужасите од Втората светска војна за да изградиме нов поредок од урнатините на Европа. Овој поредок служи како камен-темелник на стабилноста и просперитетот за овој континент, кој останува стабилен партнер за Соединетите држави. Што е најважно, се заснова на единство, соработка и взаемна доверба“, заклучи Брнз.

Претседателот на главниот одбор на Сојузот на борците, Никола Стојановски, во своето излагање потсети на улогата што Северна Македонија ја одигра во борбата против фашизмот.

„Денес кога оддаваме почит и сеќавање на големите жртви и заедничката борба за слобода, Сојузот на борците со гордост го истакнува нашиот придонес за слободна и демократска Европа, заедницата со која ги споделивме идеалите на новото време. Таа Европа и тој свет, драги пријатели, да биде против неофашизмот и екстремниот популизам, против ксенофобијата, расизмот, верската нетолеранција и другите насилства, против војните, хегемонистичките наметнувања, тероризмот во неговите облици. Опасноста да ја замениме со реафирмирање на начелата на Обединетите нации, човековите права, правото и правдата во светот“, рече Стојановски.

Божин Милосавлевски, жител на село Вратница ги прераскажа преданијата од своите соселани кои херојски помогнаа при спасување на пилотите.

Заев: Вечна слава на сите кои ги дадоа своите животи во борбата против фашизмот, низ која се издигна и македонската државност, водена од начелата за правда, солидарност и еднаквост

По повод 9-ти Мај, денот на победата над фашизмот во Втората светска војна, претседателот на Владата на Република Северна Македонија, заедно со амбасадорката на САД во земјава Кејт Мари Брнз, претставници на Сојузот на борци, се поклони пред споменикот подигнат во чест на петмина американски пилоти, во село Вратница, тетовско.

Во прилог интегрално обраќањето на претседателот на Владата, Зоран Заев.
 
„Денеска, на 9 мај, денот на победата над фашизмот во Втората светска војна, се поклонивме пред споменикот кој е подигнат во чест на петмината американски пилоти.
Двајца од нив ги загубија животите кога на 26 август 1944 година, нивниот авион беше соборен од окупаторските сили на територијата на тогашна Македонија.
Останатите тројца членови на екипажот на американскиот бомбардер „Либератор Б-24 Г“, со кодно име „Наша Љубов“ кој бил погоден и паднал на падините на Шар Планина над селото Вратница, биле спасени и евакуирани на безбедно.
Оваа пожртвувана и храбра акција на цивилното население од Вратница е еден редок и скапоцен настан кој на уште еден силен начин ја потврдува јасната и непоколеблива определба на македонскиот народ и на припадниците на сите други етнички заедници за време на Втората светска војна.
Застанати на страната на Сојузот на прогресивните антифашистички сили, не само што ставија крај на крвавата светска војна на бојните полиња, туку му ставија крај и на погромот на фашизмот заради кој беа погубени милиони недолжни цивили и луѓе во логорите на смртта.
Сеќавањето и чествувањето на настанот од 1944 година во Вратница и поменот на петмината пилоти веќе е прифатен како еден од најсимболичните моменти од нашата заедничка соработка со САД.
Соработка која пред една година е крунисаната и нашето формално сојузништво како членки во НАТО, и како уште признание за вредноста на Договорот за стратешко партнерство од 2008 година.
Се поклонивме пред овој споменик денеска по повод 9 Мај, Ден на победата над фашизмот.
Тоа е датум за паметење на милионите жртви. Датум за чествување но големото дело на прогресивните сили со кое беше поразено најголемото зло - фашизмот, кој по Втората светска војна зад себе остави ужас и рушевини на нашиот континент и во светот.
Токму низ овој вител на војната се издигна и македонската државност, водена од начелата за правда, солидарност и еднаквост.
Во темелот на македонската државност се вградени заложбите, напорите и саможртвата на  огромен број генерации на борци, кои не се штедеа себеси, ниту својата младост и своите животи.
Голема чест а истовремено и гордост, како продолжувач на традициите, и како претседател на Владата на Република Северна Македонија, да се поклонам на борците кои се боревте и сé уште се борите против фашизмот. Се поклонувам на Вашето дело. И чест ми е да го продолжувам Вашето дело, кое за мене е аманет борбата против фашизмот никогаш да не запре.
Почитувани,
Нашето сојузништво со Соединетите американски држави продолжува и понатаму да ја гради нашата успешна приказна на заедништво и на споделување на вредностите на кои е изграден најмоќниот воено-безбедносен сојуз, НАТО.
Со нашето учество во мисиите на НАТО и со поддршката на другите активности на Алијансата, заедно се справуваме со гео-политичките предизвици.
Вечна слава на сите кои ги дадоа своите животи во борбата против фашизмот за време на Втората Светска војна. Нека е вечен поменот на петмина пилоти од авионот „Наша Љубов“. Да го чуваме и унапредуваме пријателството и сојузништвото со Соединетите Американски држави.
Почитувани сограѓани, борци и соборци, вљубеници во слободата,
Борците од НОБ, ни дарија држава за да ја чуваме, да ја развиваме. Да ја отвориме кон светот на кој природно му припаѓаме. Во име на која, имаме света обврска гласно да се спротивставиме на фашизмот секогаш кога ќе видиме и негов најмал знак.
Нека ни е честит и вековит Денот на победа над фашизмот!

Благодарам.“