Министерот за одбрана на Република Македонија, Фатмир Бесими денеска оствари протоколарна  средба со новоименуваниот Амбасадор на Република Косово во Република Македонија, Илбер Хиса.

На средбата, соопшти Министерството за одбрана, е потврдена одличната соработка од областа на одбраната меѓу двете земји, а истовремено е изразена подготвеноста на МО и на АРМ за поддршка во јакнењето на одбранбените институции на Република Косово преку пренесување искуствата во одбранбените реформи и изработката на стратегиските документи, како и подготвеност за ставање на располагање на нашите национални капацитети кои ги имаме понудено во регионален контекст (Воено медицинскиот центар, Полигонот Криволак, Регионалниот центар за медиуми и комуникации).

Укажано било и на подготвеноста на Македонија да даде поддршка за 2-4 кадети во воената академија во Скопје во наредната учебна година за кандидати од Косово, како и воените вежби кои би се одвивале во Криволак од страна на косовските безбедносни сили. Притоа, се споменала и можноста за трансфер на искуства во однос на најновата софтверска апликација за буџетско планирање и логистика.
 
На средбата било дискутирано за можностите на идно зајакнување на соработката и довербата помеѓу двете соседски земји, како и за понатамошно продлабочување на воспоставените билатерални релации во делот на одбраната, како и афирмативниот став на Република Македонија за поддршката кон пристапувањето на Република Косово во сите регионални иницијативи и соработката во евроатлантските интеграциски процеси.