„Клинички патеки“ е новата крупна реформа што ја воведува Министерството за здравство, која ќе има сериозно позитивни ефекти на неколку аспекти на функционирањето на здравствениот систем во целост, информира министерот за здравство Никола Тодоров на денешната прес - конференција.

Овој проект е долгогодишна пракса во сите современи здравствени системи, потенцира Тодоров, но и затоа што сериозно влијае на намалување на клиничките компликации, на лекарските грешки, има позитивно влијание на намалување на болничкиот престој на пациентите, за полесно и подобро следење на финансиските трошоци за секоја процедура, за да не се избегне ниту една процедура пропишана да се преземе за секое заболвуање...

Клучно е, нагласи тој, што по приемот на секој пациент во неговото медицинско досие мора да се приложи „Клиничка патека“.

-  Ова ќе биде дел од здравствената евиденција што задолжително треба да ја води секоја здравствена установа. Ова се процедури кои што треба да се направат за секоја конкретна дијагноза. Ова ќе има силно влијание на квалитетот на здравствената нега, рече министерот Тодоров, додавајќи дека засега не се предвидени санкции доколку не се испочитува обврската за „Клиничките патеки“, но доколку пациентот смета дека не се преземени потребните процедури може да се жали до Министерството за здравство каде што ќе се направи контрола.

На овој начин здравствените власти, пациентите и здравствените работници, истакна Тодоров, во секое време ќе знаат која здравствена процедура треба да се преземе.

Клиничките патеки треба да бидат готови до средината на ноември, по што официјално ќе бидат објавени во службен весник. Досега се направени над 40 „Клинички патеки“,  од кои најмногу за Инфективната клиника. До средината на ноември сите здравствени установи имаат обврска да изработат  за 20 - те најфреквентни дијагнози кои ги поставуваат во соодветната клиника.

Исклучок од „Клиничката патека, посочи, ќе постои само доколку надлежниот лекар тоа го нотира и даде образложение и тоа го потврди со свој потпис.