Медијаторот во грчко-македонскиот спор за името Метју Нимиц по средбата со премиерот Никола Груевски изјави дека добил силно уверување оти решавањето на проблемот е врвен приоритет на македонскиот државен врв, што е охрабрување за него. Прашан дали по разговорите во Атина и во Скопје може да сe каже оти сега, прв пат по 20 години, има шанса да се реши проблемот, експлицитно одговори „да“.

- Зборувавме за специфичности, за разновидни можности, а не само општо. Изнесов некои идеи и добив одредени реакции. И знам дека ова е нешто што треба да се постигне. По мојата посета на Атина и сега на Скопје имам чувство дека постои зголемен интерес и сериозно вимание во однос на можностите за постигнување решение. Тоа е многу важно бидејќи лесно е да се каже ајде да го реши името и да се зборува за општи работи. Но, сите знаеме  дека ова е врвно прашање и потребна е голема внимателност за неговото решавање. А секако овде постои интерес за тоа, рече Нимиц.

Медијаторот истакна оти е охрабрен од разговорите во Скопје и Атина и најави дека ќе ја забрза динамиката на преговори во Њујорк. Со двајцата преговарачи, Зоран Јолевски и Адамантиос Василакис, ќе работи на разработка на идеите кои се конструктивни и обмислени и се надева оти ќе има напредок.

Toj не сакаше да прецизира за какви идеи и предлози станало збор за, како што вели, да не го попречува процесот.

- Инволвиран сум во ова прашање од 1994 година и не можам да кажам дека станува збор за сосема нови идеи. Но, работите се издигнуваат на други нивоа и во други контексти и сметам дека секогаш постои можност за креативност и да се дојде до позитивен заклучок, рече Нимиц.

Медијаторот Нимиц денеска во Скопје се сретна и со претседателот Ѓорге Иванов и со шефот на дипломатијата Никола Попоски.