За девет години невработеноста во Прилеп е намалена за 10.000 лица, главно со проекти преку Агенцијата за вработување и со активирање на индустриските зони, изјави вицепремиерoт и министер за финансии  Зоран Ставрески при денешната посета на Прилеп.

Според Ставрески, постигнати се добри резултати со тоа што во периодот од 2006 до 2015 година во Прилеп за речиси 10.000 лица е намален бројот на невработени.

- Голем дел од нив се вработени преку активните мерки на Аагенцијата за вработување, како што се самовработувањето, кредитите, грантовите, преку проектот „Македонија вработува“ и слично, рече Ставрески, додавајќи оти добар дел од новите вработувања се во компаниите - странски инвестиции, во околината и во Прилеп, како и во индустриските зони.

Тој ги посочи компаниите - странски инвестиции „Дрекслермаер“, „Гентерм“ и „Акомпласт“, каде има голем број вработувања, а се очекуваат и нови, но и индустриската зона во Прилеп каде се очекуваат неколку домашни фабрики да отворат погони и нови работни места.

- Секако, има вработувања и во локалните фирми. Тие овие години ја искористија добрата бизнис клима, ниските даноци, преку евтините кредити, така што со сите тие мерки помогнавме да се реализираат вработувањата и во домашните фирми, истакна Ставрески.