Министерот за надворешни работи, Никола Попоски, денеска ја прими во проштална средба Александра Пападопулу, амбасадор на Република Грција во Република Македонија.

Заблагодарувајќи се на залагањата и шестгодишниот ангажман на амбасадорот Пападопулу во Република Македонија, министерот Попоски ја потенцираше нашата подготвеност за унапредување на односите и соработката меѓу  двете земји, во интерес на стабилноста, просперитетот и ЕУ  интеграцијата на регионот.

На средбата, министерот Попоски нагласи дека стратешки интерес на Република Македонија и на регионот во целина, е што поскорешна интеграција во евроатлантските и во европските структури, и во тој контекст потребна е отворена поддршка и од Република Грција.

Притоа, подвлече дека Република Македонија е целосно посветена на споделување на идејата за заедничка иднина во Европската унија и во таа насока, изрази очекување дека и Република Грција ќе ги вреднува напорите што нашата земја ги вложува на овој  план.