Министерката за култура Елизабета Канческа-Милевска денеска во Крушево ја промовираше втората обновена куќа од староградска архитектура. Се запозна со текот на обновата на музеите во историско Крушево и најави дека в година активно ќе се работи на обновата на Македониумот.

По првата обновена крушевска куќа лани со 3 милиони денари, денеска беше претставена обновената куќа на семејството Важарови. Градена е во  1877 година, а сегашните сопственици во 1962 ја купиле од семејството Корнети. За обнова на фасадата на куќата на Важарови се вложени 4 милиони денари и тим од прилепскиот Завод и музеј работеше месец и половина. Од завршениот зафат посебно беше среќна  Милјана Атансоска-Важарова.

- Куќата е типичен пример на автентична староградска крушевска архитектура, високо издигната на камени основи, со раскошни орнаменти на фасадата и во внатрешноста.  Таа е дел од староградското јадро во Крушево заштитено со закон. Ние сме задоволни од стручноста на прилепскиот Завод и музеј и за брзата обнова, изјави министерката Канческа-Милевска. Најави дека годинава ќе почне обнова на трета куќа во Крушево од автентична староградска архитектура, а во програмата за обнова се и фасади во Кратово, Кичево, Охрид, Скопје и во Прилеп.

На работната посета на Крушево, министерката беше информирана и за текот на обновата на музеите. Обновени се покривите и фасадите на Музејот на Мартиноски, Музејот на Илинденското востание и на Леарницата, а оваа година ќе се обновуваат и музејските поставки. Мминистерството ќе се фокусира на обновата на Македониумот.

- Од Музејот во Крушево како приоритетни годинава се посочени обновата на потпорните и оградните ѕидови околу Македониумот.  Прилепскиот завод и музеј ќе подготви проект за в година да се реконструира фасадата на споменикот и да се работи на обнова на витражот, рече Канческа-Милевска.

За подобра работа на Крушевскиот музеј, додаде таа, вработени се четири стручни лица, а работи и сувенирницата.

Директорот на Крушевскиот музеј Зоран Богески на новинарско прашање што се случува со Музејот на НОБ, објасни дека во 1989 година  Сојузот на борците го преотстапил на Крушевскиот музеј но дека објектот бил  дивоградба.

- Го решававме прашањето со имотно-правните односи и одобренија. Лани добивме решение за заштита на поставката. Сега се активиравме за заштита и реновирање на објектот, рече Богески.

Министерката за култура за време на престојот во Крушево го посети и гробот на Тоше Проески на Гумење, а во Спомен-куќата ја разгледа и новата изложба на фотографии на Тоше.