Министерот за надворешни работи Никола Попоски денеска имаше работна средба со амбасадорите на Хрватска, Црна Гора, Србија, Албанија, Босна и Херцеговина и Косово.

Целта на средбата, како што соопшти Министерството за надворешни работи, било запознавање со активностите кои ги презема Република Македонија во рамките на процесот на пристапување во ЕУ, како и размена на мислења за актуелни прашања од билатералната и регионалната соработка во контекст на евроинтеграцијата.

Попоски се осврна на претстојното почнување на пристапниот дијалог на високо ниво меѓу Владата на Макеоднија и Европската комисија на 15 март 2012 година во Скопје, во присуство на еврокомесарот Филе.

- Пристапниот дијалог е нова платформа за соработка и продлабочена дебата со Комисијата за значајни теми поврзани со Копенхашките критериуми, и тоа владеење на правото, реформа на јавната администрација, медиуми, реформа на изборниот процес и економски критериуми за функционална пазарна економија. Дијалогот ќе трае сè до почетокот на пристапните преговори со ЕУ, што останува примарна цел и заложба на Македонија и нашите напори ќе продолжат да бидат насочени кон нивно што е можно поскоро отворање, подвлече министерот Попоски. 

Говорејќи за состојбите во регионот, министерот ја посочи важноста на перспективата за членство во ЕУ и потребата таа да се одржува силна,  визибилна и кредибилна. Упати честитки до амбасадорите за постигнувањата на нивните земји на планот на евроинтеграцијата, нагласувајќи дека успехот на секоја земја е успех и за целиот регион.

Македонија, како и досега, ќе продолжи со проактивниот и конструктивен придонес за унапредување на билатералната и регионална соработка, во духот на добрососедските односи и пријателство, меѓудругото и преку Претседателството со Процесот за соработка во Југоисточна Европа кое ќе го преземе во јуни оваа година од Србија.

Амбасадорите посебно ги нагласија одличните односи со Република Македонија, и во тие рамки, поддршката и севкупната меѓусебна соработка на планот на евроинтегративниот процес, без разлика на достигнатиот степен и статус во тој процес од првостепена надворешно-политичка цел. Заеднички било констатирано од нивна страна дека Република Македонија, која се соочува со подолг застој во овој процес и покрај исполнувањето на критериумите и добиените препораки, час поскоро треба да ги отпочне преговорите за членство во ЕУ, се вели во соопштението на МНР.

Од нивна страна е оценето дека тоа не само што ќе има силен поттик за севкупниот развој на Република Македонија, туку ќе претставува и најзначајниот сигнал за охрабрување на останатите земји да продолжат со реформите и приближувањето кон ЕУ и значително ќе придонесе и за мирот, стабилноста и економскиот развој на целиот регион.