Ние не смееме да си дозволиме да испратиме порака дека за нас постои алтернативно решение, освен полноправното членство во ЕУ, истакна во емисијата „Трилинг“ на ТВ 24 претседателот на Владата Зоран Заев и додаде дека Ние немаме претензии да бидеме членка на ЕУ само заради членство.

„Патот кон членството, низ преговорите, низ поглавјата е, всушност, тоа што нам ни треба – европеизација дома. Некој ќе рече дека не ни треба ЕУ за да се европеизираме, ама не е така. Ни треба во голем дел и тоа најдобро се гледа низ примерот на источноевропските земји. И на нив можело да се каже дека не им требала ЕУ за да се европеизираат, ама изодувањето на европскиот пат бил усовршување, чекирање на поглавјата од „акито“, адаптирање на законодавството на ЕУ и европските пракси“, потенцираше Заев за време на интервјуто.

Заев нагласи дека членството во ЕУ останува силна аспирација за огромен процент на нашите граѓани за кои за повеќе од 75% ЕУ нема алтернатива.

„Ние со ЕУ имаме 1% царина, ние сме во европскиот пазар. Ако ги подигнеме и имплементираме европските стандарди дома, ние ќе бидеме комплетно дел од тој заеднички европски пазар и затоа Европската економска заедница не е алтернатива за нашето членство во ЕУ. Само од нас зависи колку ќе ги кренеме нашите перформанси дома. Ги намаливме царинските давачки за ЕУ согласно Договорот за стабилизација и асоцијација и Светската трговска организација, и сето тоа не прави ние да бидеме веќе внатре. Ние сме во голема мерка во европскиот пазар“, истакна во емисијата „Трилинг“ на ТВ 24 претседателот на Владата Зоран Заев.