Zëvendëskryeministri përgjegjës për çështje ekonomike, koordinim me resorët ekonomikë dhe investimet, Fatmir Bytyqi, së bashku me drejtorin e Drejtorisë për Zona të Zhvillimit Teknologjik-Industrial, Jovan Despotovski dhe kryetarin e Prilepit, Ilija Jovanovski vizituan fabrikën Genterm, e cila punon në ZIZHT Alinci.

 Pas takimit me menaxhmentin e Genterm dhe xhiros së bërë proceseve prodhuese të kompanisë, Zëvendëskryeministri Bytyqi theksoi se ajo bëhet fjalë për një kompani të avancuar teknologjikisht, me investime mbi 36 milionë euro dhe me gati 2200 të punësuar, me çka pozicionohen në një nga punëdhënësit më të mëdhenj individualë në rajon, kurse aktivitetet e tyre të realizuara deri më tani, tregojnë se ata me të vërtetë kanë qëllime serioze për të bërë biznes në vendin tonë dhe se klima e biznesit këtu është me të vërtetë e nivelit të lartë.

“Qeveria e Republikës së Maqedonisë së Veriut, si asnjëherë më parë, kujdeset për investitorët ekzistues, punon në tërheqjen e investimeve të reja nga kompanitë e huaja, por edhe në stimulimin e investimeve nga kompanive vendase, janë në interes të rritjes ekonomike më të shpejtë dhe të qëndrueshme, por dhe jetë më të mirë për qytetarët. Kur bëhet fjalë për masat mbështetëse, do të doja t'ju kujtoj se vitin e kaluar siguruam një mbështetje direkte rekorde në lartësi prej rreth 65 milionë euro për kompanitë që prodhojnë dhe investojnë në modernizim, zhvillim teknologjik, dixhitalizim dhe zhvillim të potencialit njerëzor. Nga ato fonde, 25,6 milionë euro u ndanë për kompani të huaja që operojnë në ose jashtë zonave IZHT, përfshirë këtu dhe kompaninë Genterm. Me këtë tregojmë se ne kemi një angazhim të jashtëzakonshëm ndaj obligimeve të ndërmarra nga Qeveria në raport me pagesën e mjeteve financiare ndaj kompanive. Do të doja të lëvdoj a Genterm, e cila është një nga kompanitë që shumë kohë para afatit të përcaktuar në marrëveshje, arriti të realizojë obligimet e saj në lidhje me ciklin e investimeve dhe arritjen e numrit të të punësuarve, dhe ne në njëfarë mënyre e shpërblyem me pagesë të parakohshme të subvencioneve për realizimin e detyrimeve kontraktuale”, tha Bytyqi.

Zëvendëskryeministri shtoi se Qeveria do të vazhdojë të krijojë politika komplementare që do të nxisin sektorin e biznesit. Kjo nënkupton subvencione të drejtpërdrejta financiare përmes masave nga Ligji për mbështetje financiare, i cili këtë vit do të ndryshohet me çka do të lehtësohen kushtet e aplikimit, masat e Fondit për inovacion dhe zhvillim teknologjik, masat e Agjencisë së punësimit për riaftësim dhe rikualifikim të fuqisë punëtore, kurse këtu janë edhe shumë projekte të infrastrukturës, si dhe ndryshime në ligjet për lehtësime doganore dhe tatimore, që paraqet një kompleks masash që ekonominë tonë do ta bëjnë shumë më konkurruese.

Drejtori i DZIZHT, Jovan Despotovski, tha se së bashku me Zëvendëskryeministrin Bytyqi promovojnë një kontakt dhe komunikim të ri, më dinamik, më të drejtpërdrejtë me investitorët.

“Kjo cilësi e re në raportet tona, në raportet e Qeverisë me investitorët do të vazhdojë dhe më tej.  Cilësinë e re e shohim në faktin se ne i inkurajojmë kompanitë jo vetëm të përmbushin planet e tyre të investimeve, por edhe të shkojnë më shpejt në përmbushjen e afateve edhe në aspekt të vëllimit të investimeve dhe vendeve të punës, dhe në mënyrë plotësuese ajo që është gjithashtu shumë e rëndësishme edhe në aspekt të rritjes së pagave. Konkretisht, kompania Genterm është një nga shembujt pozitivë që vitin e kaluar arriti numrin e parashikuar të vendeve të punës me mbi 2000 njerëz, që përndryshe sipas marrëveshjes për ndihmë shtetërore duhet të ishte arritur në 2024. Megjithatë, kompania nuk ishte e vetme në atë projekt. Shteti, Drejtoria, Qeveria qëndron pas dhe gjithashtu para kohe, pra 4 vjet para afatit përmbushi pjesën e tij të obligimit. Me këtë, ne u dërgojmë një mesazh, qartë, deri te investitorët se po, ne duam që ata të realizojnë planet e tyre të investimeve dhe ta bëjnë atë më shpejt dhe më dinamikisht”, theksoi drejtori Despotovski.

Drejtori i Genterm, Andrij Hafinets shprehu kënaqësinë për bashkëpunimin e kompanisë me pushtetin qendror dhe lokal, me ç’rast theksoi se misioni i kompanisë është të krijojë dhe të japë zgjidhje unike termale që do të bëjnë një ndryshim të rëndësishëm në jetën e përditshme, përmes përmirësimit të shëndetit, komoditetit, komforit dhe efikasitetit energjetik.

“Kompania jonë prodhon produkte kryesisht për industrinë e automobilave, përfshirë teknologjitë e avancuara për ngrohësit e ulëseve dhe timonëve, ventilatorët, ne krijojmë teknologji që përmirësojnë efikasitetin energjetik për automobilat hibridë, përfshirë sistemin e menaxhimit të energjisë së dritës që janë nxitësit kryesorë të suksesit të Genterm. Në emër të Genterm, ne vlerësojmë çdo mirënjohje që marrim për raportet tona korrekte të biznesit me Qeverinë dhe përpjekjet e shtetit për të siguruar një klimë të mirë biznesi në regjion. Ne i rrisim sasitë tona prodhuese nga viti në vit, kurse numri i të punësuarve po rritet. Kompania aktualisht ka mbi 2.000 të punësuar. Shpresojmë që klima e biznesit të mbetet e volitshme edhe në të ardhmen për të na mundësuar që të vazhdojmë të rritemi si pjesë e këtij komuniteti” theksoi Hafinets.