Kryeministri Dimitar Kovaçevski në një intervistë për “To Vima” tha se vonesa afatgjatë e integrimeve europiane ndikon në euroskepticizmin dhe mosbesimin në përgjithësi, zgjerimi i BE-së do të rrisë sigurinë dhe do të stabilizojë demokracinë.  Kryeministri Kovaçevski thotë se është shumë e rëndësishme që Maqedonia e Veriut dhe Shqipëria të fillojnë negociatat për anëtarësim me BE-në pa vonesë, veçanërisht në kontekstin e luftës në Ukrainë.

Në intervistën për “To Vima” pas pjesëmarrjes në Forumin Delphi në Greqi, kryeministri Kovaçevski flet për disa tema, duke përfshirë perspektivën e BE-së, luftën në Ukrainë, por edhe pasojat për vendin tonë.

Kryeministri porositi se “NATO dhe BE duhet të ruajnë besueshmërinë e tyre për të forcuar rajonin”, dhe politika e dyerve të hapura është një sukses historik që garanton paqen dhe sigurinë në të gjithë kontinentin evropian.

“Kjo politikë duhet të vazhdojë të sigurojë integrimin, sigurinë dhe stabilitetin e rajonit në Ballkanin Perëndimor. Vonesa afatgjatë në integrimin evropian ndikon në euroskepticizmin dhe mosbesimin në përgjithësi. Ne duhet të kapërcejmë mosmarrëveshjet rajonale. Kjo është çështje sigurie sot, jo ekonomi. Zgjerimi i BE-së do të rrisë sigurinë. Do të stabilizojë demokracinë. Është shumë e rëndësishme që Maqedonia e Veriut dhe Shqipëria të fillojnë negociatat e anëtarësimit me BE-në pa vonesë”, tha Kovaçevski.

Kovaçevski thekson se janë identifikuar dhe monitoruar aktivitetet ruse në vend dhe në rajon, sqaron se si brenda ashtu edhe jashtë Parlamentit kemi parti “të cilat e kanë shprehur hapur mbështetjen e tyre për Rusinë dhe në të njëjtën kohë në hapësirën kibernetike ka prani të konsiderueshme të “grupeve të organizuara që mbështesin sulmin rus dhe relativizimin e konfliktit që nuk duhet nënvlerësuar”.

“Këto përpjekje synojnë të krijojnë një dilemë në lidhje me rolin strategjik të NATO-s dhe BE-së në rajon, për të minuar besimin e qytetarëve në këto vendime strategjike të vendit tonë. Nëse BE tregon mungesë dhe dobësi në Ballkanin Perëndimor, palët e treta do të kenë më shumë mundësi për të mbushur boshllëkun, i cili është i një rëndësie të veçantë gjeostrategjike,” tha Kovacevski për shkak të sfidave që kanë penguar integrimin tonë evropian.

Kryeministri Kovaçevski shtoi se për Maqedoninë e Veriut nuk ka alternativë për anëtarësimin në BE.

“Për ne është një pranim i vlerave dhe angazhimeve më të larta demokratike perëndimore për të përmbushur standardet evropiane në shoqëri dhe institucione. Pengesa për fillimin e negociatave mes Shqipërisë dhe Maqedonisë së Veriut ndihet në të gjithë rajonin si një goditje për Bashkimin. Mungesa e miratimit të kornizës së negociatave është duke humbur kohë të vlefshme. Është e rëndësishme, veçanërisht në kontekstin e luftës në Ukrainë, që procesi të fillojë pa një ditë vonesë. Është e nevojshme që Maqedonia e Veriut të ketë një perspektivë të kristaltë evropiane, të ketë një proces integrues të parashikueshëm, të besueshëm, të fortë dhe të përshpejtuar”, tha kryeministri Kovaçevski.