Filloi Takimi joformal ministror i SHBA – Karta e Adriatikut, i cili mbahet në kuadër të kryesimit të Maqedonisë së Veriut me iniciativën.
Takimin e hapi Ministri i Punëve të Jashtme, Bujar Osmani, në cilësinë e kryesuesit të A5, ndërsa fjalim përshëndetës kishte edhe Ministri i Punëve të Jashtme të Ukrainës, Dmitro Kuleba.
Në fjalimin e tij, Osmani i prezantoi prioritetet e kryesimit tonë me Kartën, që po mbahet në 20 vjetorin e formimit të saj. Njëherit, e rikonfirmoi mbështetjen e tij të pahamendshme për Ukrainën dhe popullin ukrainas, si dhe dënimin e fuqishëm për agresionit rus.
“Takimi i sotëm ministror është një mundësi tjetër për të theksuar mbështetjen e mëparshme të vendeve anëtare të Kartës për Ukrainën, por edhe për të theksuar gatishmërinë tonë për ndihmë të mëtejshme, praktike dhe humanitare për popullin ukrainas. Që nga fillimi i luftës e deri më sot, të gjitha vendet anëtare të A5 nga rajoni kanë dhuruar rreth 17 milionë dollarë ndihmë humanitare, ndërsa pjesa më e madhe e vendeve anëtare të rajonit kanë siguruar rreth 214 milionë dollarë ndihmë ushtarake. Së bashku me ShBA-në, këto shuma sërish i kalojnë 1.62 miliardë dollarë ndihma humanitare, respektivisht 32.7 miliardë ndihma ushtarake”. – theksoi Osmani.
Ministri Kuleba i përshëndeti aktivitetet dhe prioritetet e kryesimit të Maqedonisë së Veriut me SHBA – Karta e Adriatikut, që po mbahet në kushtet e luftës brutale të Rusisë në Ukrainë. Njëherazi, ai falënderoi për ndihmën që Maqedonia e Veriut dhe vendet e tjera të rajonit e ofrojnë për Ukrainën, duke theksuar se A5 është e një rëndësie thelbësore për sigurinë e Evropës.
“Me rëndësisë thelbësore është që Karta e Adriatikut të përshtatet me realitetin e ri në dritën e sfidave aktuale të sigurisë. I mirëpres planet tuaja për forcimin e rolit politik të Kartës dhe gjetjen e mekanizmave të rinj të sigurisë për rajonin. Karta e Adriatikut e lehtësoi integrimin euroatlantik të Ballkanit. Ukraina është në rrugën drejt NATO-s, kështu që ne e dimë se sa e rëndësishme ishte kjo”, theksoi Kuleba.
Njëherit, falënderoi për ndihmën që Maqedonia e Veriut dhe vendet e tjera të rajonit ofrojnë për Ukrainën, gjë që është e një rëndësie jetike në fushën e betejës për mbrojtësit ukrainas, të cilët me jetë mbrojnë si Ukrainën, ashtu dhe vlerat demokratike.
