Kovaçevski: E ardhmja e Maqedonisë së Veriut është në BE, vendimet e guximshme dhe shtetërore janë ato që sjellin përparim

Kryetari i Qeverisë së Republikës së Maqedonisë së Veriut, Dimitar Kovaçevski, sot ishte nikoqir i Kryetarit të Qeverisë së Republikës së Kroacisë, Andrej Plenkoviq, i cili po qëndron për vizitë zyrtare në vend.

Në vizitën zyrtare në vend, Kryeministri Plenkoviq, i cili u prit me nderimet më të larta shtetërore dhe ushtarake, shoqërohet nga ministri kroat i Ekonomisë dhe Zhvillimit të Qëndrueshëm dhe deputetes së Kuvendit të Kroacisë.

Pas takimit dypalësh të dy delegacioneve në Qeverinë e Republikës së Maqedonisë së Veriut, dy kryeministrat mbajtën konferencë të përbashkët për shtyp.

Në vazhdim ua përcjellim fjalimin integral të Kryetarit të Qeverisë së Republikës së Maqedonisë së Veriut, Dimitar Kovaçevski, në konferencën për shtyp:

 “I nderuar Kryetar i  Qeverisë së Republikës së Kroacisë, Andrej Plenkoviq dhe i dashur mik,

Të nderuar përfaqësues të delegacioneve qeveritare të Republikës së Kroacisë dhe Republikës së Maqedonisë së Veriut,

E nderuar ambasadore e Republikës së Kroacisë,

Të nderuar përfaqësues të mediave dhe të nderuar qytetarë të Maqedonisë së Veriut dhe të Kroacisë.

Në fillim dua t'i uroj edhe një herë mirëseardhje të ngrohtë Kryeministrit Plenkoviq dhe delegacionit të tij në Shkup dhe ta falënderoj që pranoi ftesën time për të bërë një vizitë zyrtare në Republikën e Maqedonisë së Veriut.

Kjo vizitë vjen pas vizitës sime zyrtare në Serbi dhe Slloveni në ditët e fundit dhe jam shumë i lumtur që këto ditë kam mundësinë të bisedoj me kolegët e mi të cilët realisht, thelbësisht e kuptojnë rajonin dhe mundësitë në të cilat ndodhemi.

Më vjen mirë që sot patëm mundësinë të diskutonim hapur për marrëdhëniet dhe bashkëpunimin tonë të përgjithshëm.

Më lejoni të përsëris publikisht atë që i thashë Kryeministrit Plenkoviç pak më parë në takim, që është se Qeveria e Maqedonisë së Veriut dhe unë personalisht do të vazhdojmë të punojmë intensivisht në drejtim të thellimit të marrëdhënieve me Kroacinë, zgjerimit të bashkëpunimit, përforcimit të besimit reciprok, mirëkuptimit dhe fqinjësisë së mirë.

E di që ky nuk është vetëm mendimi im personal, është qëndrim i kësaj Qeverie, por qëndrim i çdo qeverie që nga pavarësia e vendit tonë e deri më sot, sepse Kroacia është e lidhur jo vetëm nga e kaluara e përbashkët, por edhe nga një dëshirë për një të ardhme më të mirë të përbashkët në BE.

Kësaj duhet ti shtohen edhe disa fakte: dy vendet tona nuk kanë çështje të hapura, ne po ndërtojmë dhe thellojmë vazhdimisht dialogun politik së bashku, duke rritur bashkëpunimin ekonomik-tregtar dhe duke gjurmuar vazhdimisht drejtime të reja për bashkëpunim të ndërsjellë.

Për marrëdhëniet tona të shkëlqyera dypalëshe flasin 44 marrëveshje dhe dokumente dypalëshe ndërkombëtare të lidhura dhe 15 marrëveshje të tjera janë në fazën e iniciativës.

Bashkëpunimi me Kroacinë është veçanërisht i zhvilluar në fushën e integrimit tonë evropian, ku Kroacia është ndër mbështetësit më të zëshëm dhe më të qëndrueshëm të integrimit tonë evropian.Për këtë  flasin veprat, jo vetëm fjalët. Ndër këto vepra është vendimi për hapjen e negociatave me Maqedoninë e Veriut dhe Shqipërinë, i marrë pikërisht gjatë presidencës kroate të BE-së në gjysmën e parë të vitit 2020 dhe në rrethana të jashtëzakonshme për shkak të pandemisë së virusit COVID-19.

Me këtë u arrit një nga prioritetet e presidencës kroate të BE-së.

Por për këtë mbështetje flasin edhe 15 tvining projektet që Kroacia ka zbatuar në vendin tonë.

Përvoja e ambasadorit ish-kryenegociator dhe këshilltar i Kryeministrit Plenkoviç, i cili sot është kryekëshilltar i kryenegociatorit tonë, përvoja e të cilit në negociatat me BE-në dhe përfaqësimin e Kroacisë në BE është e paçmueshme për ne dhe është gjithashtu pjesë e mozaikut që ne kemi një proces të suksesshëm të skriningut me BE-në.

Sot, me përgjegjësi të plotë pohoj se ajo mbështetje nuk po e humb intensitetin, por përkundrazi, mbështetja e Maqedonisë së Veriut nga Kroacia po rritet vazhdimisht.

Në planin kulturor, me hapjen e Qendrës Kulturore dhe Informative të vendit tonë në Zagreb vitin e kaluar, ne po kontribuojmë në thellimin e bashkëpunimit kulturor dhe afrimin e popujve tanë.

Në këtë drejtim, ne jemi mirënjohës për përkushtimin e qytetarëve tanë që jetojnë në Kroaci dhe i realizojnë të drejtat e tyre, duke i avancuar ato dita-ditës.

Ajo që duam të bëjmë në periudhën e ardhshme është forcimi dhe avancimi i bashkëpunimit tonë ekonomik dhe tregtar.

Tregtia e përgjithshme mes dy vendeve për vitin 2022 arrin në 217 milionë euro dhe ka potencial të madh përmirësimi dhe me mundësi dyfishimi në të ardhmen.

Kroacia ka investuar rreth 108 milionë euro në Republikën e Maqedonisë së Veriut, dhe sipas strukturës së investimeve, investimet më të përfaqësuara janë në sektorin e shërbimeve dhe ushqimit.

Besoj se ka një sërë fushash ku bashkëpunimi mund të rritet më tej, veçanërisht në industrinë farmaceutike, infrastrukturën e transportit, ndërtimin dhe në turizëm.

Gjithashtu, ne po punojmë së bashku për modernizimin e infrastrukturës energjetike për furnizim cilësor dhe të pandërprerë me energji elektrike për ekonominë dhe qytetarët e vendit.

Kompania jonë e sistemit të transmetimit të energjisë SHA MEPSO është duke punuar me kompanitë kroate në projektin për ndërtimin e nënstacionit 400 kV të Ohrit, e cila si pjesë e Korridorit 8, do të lidhë Maqedoninë e Veriut dhe Shqipërinë me një linjë transmetimi 400 kV.

Gjithashtu po punohet me kompanitë kroate për rindërtimin e termocentraleve në Manastir, Prilep dhe Dubrovë dhe linjat e transmetimit Manastir-Prilep, Ovçe Pole-Veles dhe Shkup 4-Veles.

 Në drejtim të rritjes së shkëmbimit tregtarë dhe tërheqjes së investimeve të reja kroate, besoj se një kontribut të rëndësishëm do të ketë edhe klubi i biznesit maqedono-kroat, i cili është themeluar vitin e kaluar në Zagreb.

Gjithashtu duhet të forcojmë bashkëpunimin në fushën e turizmit dhe të mbështesim Programin për arsim profesional të studentëve maqedonas në turizëm në bregdetin e Adriatikut dhe nga maji 2023 deri në tetor 2023 do të vendoset linja sezonale Shkup-Split-Shkup, e cila është më shumë shenjë e thellimit të bashkëpunimit dhe transportit të lehtë e më të shpejtë të qytetarëve tanë ndërmjet këtyre 2 vendeve.

Në drejtim të dhënies së një impulsi tjetër pozitiv bashkëpunimit tonë të ndërsjellë, jemi të gatshëm të organizojmë mbledhjen e parë të përbashkët të dy qeverive me qëllim intensifikimin e bashkëpunimit dhe trasimin e aktiviteteve konkrete të radhës në marrëdhëniet tona.

Për këtë kemi rënë dakord edhe me Republikën e Sllovenisë gjatë vizitës sime të hënën dhe sot do të fillojmë bisedimet për mbajtjen e saj në të ardhmen me R. Kroacia, ku do të diskutojmë bashkëpunimin specifik në fusha të caktuara.

Si aleatë të NATO-s, ne jemi fuqishëm të përkushtuar ndaj planit të promovimit dhe ndarjes së vlerave dhe qëndrimeve të përbashkëta si anëtarë të bashkuar të Aleancës që punojnë për të arritur qëllimet e përbashkëta për paqen, stabilitetin dhe prosperitetin në këto kohë veçanërisht të vështira në kontinentin evropian.

Kryeministër Plenkoviq, jam veçanërisht i kënaqur që sot do t'i drejtoheni edhe deputetëve të Kuvendit tonë.

Zakonisht presidentët e shteteve i drejtohen Kuvendit, por sot kemi dashur që Kryeministri i Kroacisë t'i drejtohet Kuvendit, Plenkoviq dhe miku im Andrej, i cili është një nga politikanët më të rëndësishëm që më kanë mbështetur mua personalisht dhe vendin tonë gjatë vitit të kaluar gjatë fillimit të negociatave me BE-në.

Kjo flet për forcën e partneritetit dhe miqësisë sonë dhe rëndësinë që i kushtojmë bashkëpunimit me Kroacinë, i cili forcohet përmes grupeve parlamentare në dhomat legjislative të të dy vendeve.

Opinioni maqedonas, por edhe ai kroat, e dinë se po përballemi me sfida serioze, të cilat janë vendimtare për të ardhmen e mëtutjeshme të Republikës së Maqedonisë së Veriut dhe perspektivat në lidhje me integrimin evropian të vendit.

Ndryshimet kushtetuese, të cilat nënkuptojnë përfshirjen e kroatëve në Kushtetutën tonë, janë para nesh dhe shpresoj dhe bëj thirrje që ne si shoqëri të kemi sukses në gjetjen e një konsensusi mbipartiak.

Duke mbrojtur të drejtat e komuniteteve, ne mbrojmë jo vetëm identitetin e të tjerëve, por edhe tonin, dhe atë të përbashkët, me të cilin krenohemi si një shoqëri funksionale demokratike, multikulturore dhe multietnike, pavarësisht se nga vijmë.

Atë model të bashkëjetesës, të ushqyerjes së diversitetit si bazë për zhvillimin dhe përparimin e ardhshëm, ju koleg Plenkoviq e keni edhe në Kroaci, dhe pikërisht për këtë, jam i bindur se sot jemi në rrugën e duhur që do të sigurojë një të ardhme evropiane për qytetarët që duan të jetojnë në Bashkimin Evropian, por këtu, në shtëpi, në vendin e tij anëtar të BE-së. Si kroatë që jetojnë në BE, megjithatë, jetojnë në BE në Kroaci - një anëtare e BE-së.

Themelet e shtetit ndërtohen mbi vendime të guximshme të qeverisjes. Ndonjëherë zgjidhjet janë në horizont, por ndonjëherë tejkalimi i pengesave kalon në rrugën më të  vështirë.

E kam thënë në shumë raste se Republika e Maqedonisë së Veriut gjithmonë ka qenë dhe do të jetë gjithmonë në anën e duhur të historisë.

Besoj gjithashtu se tani, kur përballë nesh ka sfida që do të përcaktojnë jo vetëm të ardhmen tonë, por edhe të ardhmen e fëmijëve tanë, ne do të zgjedhim rrugën e duhur.

Rruga e duhur, për të cilën së bashku me forca të bashkuara do të vendosim se cila do të jetë e ardhmja e vendit tonë, sepse nuk ka kthim prapa. Për ne ka vetëm një rrugë - rruga drejt Bashkimit Evropian.

Dhe për gjithë mbështetjen që ju, zoti Plenkoviq, dhe qytetarët kroatë po na jepni në këtë rrugëtim, dua t'ju falënderoj edhe një herë në emër të të gjithë qytetarëve tanë."