“Ne treguam se e kemi konsoliduar ekonominë dhe në tremujorin e tretë treguam rritje prej 3%, diçka që askush nuk e priste dhe është një nga më të mirat në rajon, në Evropë. Jemi më të mirë edhe se Gjermania, Bullgaria, Greqia, Sllovenia, Mali i Zi dhe në përgjithësi nga pjesa më e madhe e vendeve të Bashkimit Evropian.
Pres që edhe në tremujorin e katërt të jetë edhe më i fuqishëm bazuar në parametrat që mora për dy muajt e parë, tetorin dhe nëntorin.
Pres që vitin e ardhshëm, sipas bisedave që kam bërë me pronarin e ri të "FENI", të fillojë prodhimi, që do të thotë eksport prej 250 deri në 300 milionë euro. Kjo përbën rreth 1,5 deri në 2 për qind të PBV-së sonë.
Pres që naftësjellësi "Vardaks" të nisë punën, çka do të ristartojë "OKTA"-n, e cila do të tregtojë në tregun e Serbisë së Jugut dhe Kosovës, një eksport shtesë që do të sjellë rritje shtesë të PBV-së.
Pres që investimet kapitale me komunat të marrin hov në tremujorin e parë dhe të dytë të vitit të ardhshëm, gjithashtu pres që kreditë, pra kredia hungareze dhe kreditë e tjera të marrin hov të plotë në tremujorin e parë të vitit të ardhshëm, kështu që, të përmbledh, pres që këtë vit ta përfundojmë me mbi 1 miliard investime të huaja, të kemi rritje të PBV-së deri në 4% në tremujorin e katërt, që do të nënkuptonte një rritje vjetore prej 3%.
Gjithashtu, pres rritje në tremujorin e parë dhe të dytë të vitit të ardhshëm bazuar në të gjitha këto parashikime për të cilat fola. Ja, deri këtu mund të them se gjërat po i shoh më qartë”, tha kryeministri Hristijan Mickoski në paraqitjen e djeshme në “Click Plus” në TV 21.
Në pyetjen se qytetarët presin rritje të pagës minimale, por nuk presin rritje të TVSH-së siç parashikon Banka Botërore, Kryetari i Qeverisë Mickoski theksoi se kjo do të ishte më e lehta nëse do të rritej TVSH-ja, mbi shpinën e qytetarëve, kjo është masa më e lehtë dhe kushdo mund të thotë se kështu duhet bërë. Por kjo është gjëja e fundit që duhet bërë pa marrë masa të tjera që do të çonin në përmirësimin e standardit për qytetarët.
Kryetari Mickoski theksoi:
“A do të kemi rritje të pagës minimale, sipas ligjit, sigurisht që po. Nëse do të bien dakord sindikatat dhe punëdhënësit, kjo është në dorën e tyre, jo në tonën. Ne jemi partnerë në këtë proces. Ka pasur dy takime të Këshillit Ekonomiko-Social, ramë dakord me ministrin që të kemi një takim çdo muaj, tani do të kemi në janar dhe shkurt. Gjendja është e tillë që disa procese nuk varen nga vetë Qeveria.
Ne jemi vetëm lehtësues në këtë proces. Nëse punëtorët dhe punëdhënësit bien dakord mes vete, çfarë mund të bëjmë ne këtu, por sigurisht do të ndodhë sipas ligjit.
Ministri i Ekonomisë dhe Punës sot informoi se sipas kësaj zgjidhjeje ligjore, paga minimale duhet të jetë rreth 24,400 denarë”.
