Në kuadër të vizitës zyrtare në Uashington, zëvendës kryeministri i parë Izet Mexhiti mori pjesë në Forumin Ndërparlamentar të Sigurisë, që u organizua nga Kongresmenët Pete Sessions dhe Robert Aderholt. 
Në këtë forum u diskutua për çështje të sigurisë për Ballkanin Pernëdimor dhe Bashkimin Europian, duke u fokusuar në nevojën për forcimin e institucioneve të mbrojtjes dhe angazhimit të shtuar të vendeve të rajonit në NATO.
 
Mexhiti në fjalimin e tij para pjesëmarrësve të Forumit Ndërparlamentar të Sigurisë theksoi se mbështetja e Shteteve të Bashkuara të Amerikës për sektorin e mbrojtjes në Ballkanin Perëndimor, pas krizës së shkaktuar nga lufta në Ukrainë ishte dhe mbetet kruciale. 

“Maqedonia e Veriut do të vazhdojë të kontribuojë për paqen dhe sigurinë globale, duke qenë një aktor i përgjegjshëm dhe burim i eksportit të paqes rajonale”, ka theksuar zëvendës kryeministri i parë Izet Mexhiti.

Ndryshe, në këtë forum pjesëmarrës ishin edhe ministri i Shëndetësisë Arben Taravari, nënkryetari e Kuvendit Antonio Milloshoski, kryetari i Komunës së Tetovës Bilall Kasami dhe shumë personalitete të tjera. Ndërsa edhe presidentja e Kosovës, Vjosa Osmani dhe presidenti i Ukrainës, Volodymyr Zelenskyy, në Forum ndanë përvojat e tyre në sfidat e sigurisë.